Samkvæmt enska fréttamiðlinum The Guardian hefur Ryan Giggs verið boðin staða í þjálfarateymi Josés Mourinhos þegar sá portúgalski tekur við Manchester United í sumar. Honum er þó af sjálfsögðu velkomið að hafna.
Búist er við því að Mourinho verði ráðinn innan tveggja sólarhringa, en Ed Woodward, varaformaður stjórnar félagsins, á eftir að funda með stjörnuumboðsmanninum Jorge Mendes, sem er fulltrúi Mourinhos. Giggs hefur verið fullvissaður um að hann eigi enn framtíð fyrir sér á Old Trafford.
Giggs hefur verið aðstoðarþjálfari Louis van Gaal síðustu tvö ár en Hollendingurinn var látinn taka pokann sinn í gær. Ef Giggs fylgir honum út um dyr Old Trafford bindur goðsögnin enda á 25 ára samstarf.