Aston Villa, félag landsliðsmannsins Birkis Bjarnasonar, tapaði svimandi háum fjárhæðum á síðasta rekstrarári, 2015-2016. Þetta var tilkynnt í dag.
Það kemur ef til vill ekki á óvart þar sem liðið féll úr ensku úrvalsdeildinni síðastliðið vor, en samanlagt tap nemur rúmum 80 milljónum punda. Það samsvarar um 11 milljörðum íslenskra króna. Rekstrarárið á undan nam tapið um 26 milljónum punda og hafði fallið því sitt að segja.
Vonir um að rétta fjárhaginn við með því að komast beint upp úr B-deildinni eru orðnar að engu, en Villa situr í 17. sæti B-deildarinnar. Birkir gekk í raðir félagsins í janúar en hefur ekki enn unnið leik.