Pep Guardiola, knattspyrnustjóri Manchester City, talaði vel um kollega sinn Claudio Ranieri sem var rekinn úr starfi knattspyrnustjóra Leicester í síðustu viku.
Ranieri gerði Leicester að enskum meisturum í vor, öllum að óvörum, en eftir að liðið var komið í fallsæti var hann látinn fara. Það hefur verið umtöluð ákvörðun víða um knattspyrnuheiminn.
„Eftir 50 ár mun fólk enn tala um hvað Ranieri gerði með Leicester. Þeir spiluðu frábærlega í gær í fyrsta leik án hans, en voru greinilega undir hans áhrifum frá því á síðasta tímabili,“ sagði Guardiola og minntist á 3:1-sigur Leicester á Liverpool í ensku úrvalsdeildinni í gær.