Oumar Niasse, framherji enska úrvalsdeildarliðsins Everton, hefur verið úrskurðaður í tveggja leikja bann af aganefnd enska knattspyrnusambandsins.
Niasse var kærður fyrir að dýfa sér vísvitandi og fiska vítaspyrnu gegn Crystal Palace í ensku úrvalsdeildinni um liðna helgi.
Niasse lét sig falla eftir litla sem enga snertingu frá Scott Dann strax á fimmtu mínútu og fékk vítaspyrnu. Úr henni skoraði Leighton Baines fyrir Everton, en Niasse sjálfur átti svo eftir að jafna metin í 2:2 sem voru lokatölur leiksins.
Niasse er fyrsti leikmaðurinn í ensku úrvalsdeildinni sem er úrskurðaður í leikbann fyrir leikaraskap.