Jóhann Berg lagt upp þriðjung marka Burnley

Jóhann Berg Guðmundsson hefur stimplað sig rækilega inn sem lykilmaður hjá Burnley sem hefur komið liða mest á óvart í ensku úrvalsdeildinni í knattspyrnu það sem af er tímabili.

Eftir 16 umferðir er liðið með 28 stig í sjöunda sætinu, aðeins fjórum stigum frá Englandsmeisturum Chelsea sem eru í þriðja sæti. Jóhann Berg lagði upp sigurmark Burnley þegar liðið vann Watford 1:0 um helgina, en þetta var hans fimmta stoðsending á tímabilinu. Hann er í sjötta sæti yfir flestar stoðsendingar allra í deildinni í ár og enginn hefur lagt upp fleiri mörk hjá liðinu.

Jóhann Berg var inn og út úr liði Burnley á síðustu leiktíð, kom við sögu í 20 leikjum og þar af 10 sinnum sem varamaður og lagði upp tvö mörk á sínu fyrsta tímabili í úrvalsdeildinni. Í ár hefur hann byrjað 12 leiki og átt þátt í þriðjungi marka Burnley, sem skorað hefur 15 mörk í deildinni til þessa.