Betra í súmóglímunni

Arsene Wenger, knattspyrnustjóri Arsenal, tjáði sig í dag um ólætin í leikmannagöngunum á Old Trafford um helgina eftir 2:1-sigur Manchester City á Manchester United.

Á meðal þess sem á að hafa gerst er að José Mourinho hafi fengið mjólkurgusu yfir sig, eftir rifrildi við leikmenn City, og að Mikel Arteta úr þjálfarateymi City hafi blóðgast í andliti. Arteta er einmitt fyrrverandi lærisveinn Wenger hjá Arsenal.

„Ég heyrði um þetta. Stundum gerist svona lagað. Þetta er skondið því í fjölmiðlum gerið þið svo mikið úr þessum stórleikjum, eins og þetta sé upp á líf og dauða, og svo gerist þetta,“ sagði Wenger.

„Þetta hefur gerst hjá okkur, þetta gerðist hjá þeim. Þetta er óheppilegt. Best væri ef að menn legðu sig 100% fram á vellinum en væru svo eins og englar utan hans. Þannig er það ekki alltaf. Maður vill að ástríðan sé öll inni á vellinum,“ sagði Wenger.

„Það er erfitt að taka því þegar maður tapar leik, að sjá fagnaðarlæti hinna. Þegar ég var í Japan kunni ég vel að meta súmóglímuna því maður gat aldrei séð hvor hafði unnið. Sigurvegarinn sýndi aldrei neina gleði því virðingin fyrir andstæðingnum er svo mikil,“ sagði Wenger.

• Blogga um frétt