Gylfi fær ekki jólaveislu

Sam Allardyce, knattspyrnustjóri Everton, hefur tilkynnt leikmönnum sínum að engin jólaveisla verði fyrir leikmennina um hátíðirnar.

Til stóð að árleg hátíðahöld leikmannanna yrðu á þriðjudagskvöldið kemur, eftir leikinn gegn Swansea á mánudagskvöldið, en Everton á að mæta Chelsea fjórum dögum síðar, á Þorláksmessu.

„Ég felldi niður jólaveisluna, það er engin þörf á slíku sem stendur vegna þess hvernig staðan var á liðinu þegar ég kom hingað,“ hefur Skysports eftir Allardyce.

Eftir leikina gegn Swansea og Chelsea taka við viðureignir við WBA, Bournemouth og Manchester United um jól og áramót, fimm leikir á fjórtán dögum, frá 18. desember til 1. janúar.

Gylfi Þór Sigurðsson og félagar í Everton eiga útileik gegn Newcastle í kvöld.

• Blogga um frétt