Hörður Björgvin Magnússon og lið hans Bristol City sem leikur í ensku B-deildinni í knattspyrnu fær Manchester City, topplið ensku úrvalsdeildarinnar, í heimsókn í kvöld í síðari viðureign liðanna í undanúrslitum enska deildabikarsins.
Fyrri leikur liðanna fór fram á heimavelli Manchester City og þar tapaði Bristol á hreint grátlegan hátt. Sigurmark heimamanna í uppbótartíma tryggði liðinu 2:1-sigur, en Bristol hafði verið yfir í hálfleik.
Hörður og félagar í Bristol City hafa skapað sér aðdáunarvert ævintýri í enska deildabikarnum í vetur og slegið út fjögur úrvalsdeildarlið, síðast Manchester United í 8-liða úrslitunum.
Sigurvegarinn í rimmunni í kvöld mætir annaðhvort Arsenal eða Chelsea í úrslitaleik keppninnar í febrúar.