David De Gea, markvörður Manchester United, sat fyrir svörum fréttamanna í Sviss í gær en United mætir svissneska meistaraliðinu Young Boys í 1. umferð riðlakeppni Meistaradeildar Evrópu í knattspyrnu í kvöld.
De Gea var spurður út í þá gagnrýni sem hann fékk fyrir frammistöðuna með spænska landsliðinu á HM í Rússlandi í sumar.
„Venjulega hlusta ég aldrei á fólk sem talar um mig. Venjulega einbeiti ég mér að mínu starfi, er einbeittur á mitt lið, reyni að bæta mig og reyni að vera eins góður og ég get svo ég hlusta aldrei á svona hluti,“ sagði De Gea, sem af mörgum er talinn vera einn besti markvörður heims.
De Gea gaf stuðningsmönnum United góð skilaboð þegar hann var spurður út í nýjan samning við Manchester United.
„Ég finn fyrir alvöru ást til félagsins og stuðningsmanna. Ég er virkilega ánægður. Þetta er eitt besta félag í heimi svo það er virkilega gott að vera hluti af því.“