Rafael Benítez kærður

Enska knattspyrnusambandið hefur kært Rafael Benítez, knattspyrnustjóra Newcastle, fyrir ummæli sem hann lét falla um dómarann Andre Marriner fyrir leik liðsins við Crystal Palace á laugardaginn. 

Benítez sagði á fréttamannafundi að Andre Marriner væri líklegur til að hafa ummæli Wilfried Zaha, leikmanns Palace, á bak við eyrað á meðan hann dæmdi leikinn.

Zaha bað á dögunum um vernd frá dómurum eftir að illa var brotið á honum í leik gegn Huddersfield um þar síðustu helgi. „Það þarf sennilega að fótbrjóta mig til við fáum að sjá rauð spjöld,“ sagði Zaha og það fór illa í spænska stjórann. 

„Zaha er góður leikmaður en þetta voru furðuleg ummæli. Marriner mun hafa þau á bak við eyrað. Hann er reynslumikill dómari, en hann er ekki sá besti þegar kemur að rauðum spjöldum. Vonandi getur hann gleymt þessum ummælum og dæmt leikinn eðlilega,“ sagði Benítez. 

• Blogga um frétt