Liverpool gæti fengið leikmann til baka

Forráðamenn enska knattspyrnufélagsins Liverpool íhuga að fá velska framherjann Ben Woodburn til baka úr láni frá Sheffield United í B-deildinni í janúar. Woodburn var ekki í leikmannahópi liðsins gegn grönnunum í Sheffield Wednesday fyrir landsleikjahléið. 

Woodburn er yngsti markaskorari í sögu Liverpool og talinn einn efnilegasti leikmaður félagsins. Hann hefur hins vegar lítið fengið að spreyta sig hjá Sheffield-liðinu og aðeins spilað 28 mínútur síðan í ágúst. 

Liverpool er ekki sátt við gang mála og vilja forráðamenn félagsins sjá hann fá fleiri tækifæri. Hann gæti verið lánaður í annað félag í janúar. 

• Blogga um frétt