Brasilíski framherjinn Richarlison kom Gylfa Þór Sigurðssyni og félögum í Everton í 1:0 gegn Watford í viðureign liðanna í ensku úrvalsdeildinni í knattspyrnu í kvöld þegar hann skoraði á 15. mínútu. Hægt er að setja markið í áhugavert samhengi.
Richarlison, sem áður lék með Watford, varð um leið fjórði leikmaðurinn í sögunni sem skorar mark í ensku úrvalsdeildinni bæði fyrir Watford og gegn Watford. Hinir þrír eru Ashley Young, Daryl Janmaat og Heiðar Helguson, fyrrverandi landsliðsmaður.
Heiðar er í miklum metum hjá Watford en hann spilaði með liðinu árin 1999-2005 og svo aftur 2009-2010. Hann skoraði á þessum árum 75 mörk fyrir liðið í öllum keppnum. Heiðar spilaði einnig í úrvalsdeildinni fyrir Fulham, Bolton og QPR.
Fylgst er með gangi mála í viðureign Everton og Watford hér á mbl.is.