Mega æfa með liðinu á ný

Brendan Rodgers knattspyrnustjóri Leicester hefur gefið þeim James Maddison, Ayoze Perez og Hamza Choudhury leyfi til að hefja æfingar með liðinu á nýjan leik frá og með deginum í dag.

Þremenningarnir voru settir í bann frá æfingum aðalliðsins um síðustu helgi eftir að upp komst um veisluhöld þeirra nokkrum dögum áður þar sem þeir brutu sóttvarnareglur.

Þeir fengu ekki að spila með Leicester í leiknum mikilvæga gegn West Ham á sunnudaginn þar sem liðið tapaði 3:2 eftir að hafa lent 3:0 undir og missti dýrmæt stig í slagnum um sæti í Meistaradeild Evrópu.

„Ég var sjálfur gríðarlega vonsvikinn með þetta framferði þeirra, en þeir gerðu mistök og þau hafa verið afgreidd. Nú heyrir þetta fortíðinni til. Strákarnir koma inn í hópinn á ný og við gerum okkur klára fyrir undanúrslitaleikinn," sagði Rodgers við Sky Sports en Leicester mætir Southampton í undanúrslitum bikarkeppninnar um næstu helgi.

• Blogga um frétt