Villa staðfestir komu Jamaíkumannsins – Grealish nálgast City

Enska knattspyrnufélagið Aston Villa hefur formlega staðfest kaup sína á jamaíska vængmanninum Leon Bailey, sem kemur frá þýska félaginu Bayer Leverkusen. Kaupverðið er sagt vera um 30 milljónir punda og gerir hann fjögurra ára samning.

Bailey er þriðju kaup Villa í sumar, á eftir sóknartengiliðnum Emiliano Buendía og vængbakverðinum Ashley Young, sem sneri aftur í sumar.

„Leon er afar spennandi sóknarmaður sem býr yfir miklum hraða og sköpunarkrafti. Við hlökkum til að sjá hann sýna gæði sín fyrir Aston Villa í ensku úrvalsdeildinni,“ sagði Dean Smith, knattspyrnustjóri Villa.

Kaupin á Buendía og nú Bailey renna stoðum undir það að Jack Grealish, stærsta stjarna Villa, sé á leið til Manchester City.

The Guardian segir viðræður langt komnar á milli félaganna og búist sé við því að Grealish gangi til liðs við Englandsmeistarana á næstu dögum. Kaupverðið á honum er sagt vera 100 milljónir punda.

• Blogga um frétt