Hollendingurinn Erik ten Hag, knattspyrnustjóri karlaliðs Manchester United, hefur verið útnefndur stjóri septembermánaðar í ensku úrvalsdeildinni.
Man. United vann báða leiki sína í mánuðinum, 1:0 á útivelli gegn botnliði Leicester City, og 3:1 á heimavelli gegn toppliði Arsenal.
Flest lið léku aðeins tvo leiki í deildinni í mánuðinum eftir að leikjum var frestað vegna fráfalls Elísabetar II Englandsdrottningar.
Ten Hag tók við Man. United í sumar og því er þetta í fyrsta skipti sem hann vinnur til verðlaunanna.