Íþróttir | Rafíþróttir | mbl | 1.6.2023 | 11:00 | Uppfært 12:22

Á lista úkraínskra íþróttamanna sem brutu lögin

Liðsmenn Natus Vincere sýndu stuðning eftir stórmótið í Brasilíu. Skjáskot/RIO

Sjö úkraínskir rafíþróttamenn eru á lista frá úkraínska íþróttaráðuneytinu en 236 íþróttamenn sitja á þeim lista og er þeim öllum gert að hafa farið úr landi eftir innrás Rússa og hafa ekki snúið aftur. Þegar Rússar réðust inn í Úkraínu var öllum karlmönnum á aldrinum 18-60 ára bannað að fara úr landi.

Fengu leyfi til þess að keppa

Ein af undantekningunum frá þessu banni var fyrir þá íþróttamenn sem þurfa að keppa á alþjóðlegum vettvangi og þurfa oft að ferðast milli landa til þess að keppa í sinni íþrótt. Þetta var þó leyft með því skilyrði að íþróttamennirnir myndu snúa til baka er keppni lauk.

Þetta voru rafíþróttamennirnir:

Viktor „sdy“
Volodymyr „Woro2k“
Serghij „DemQQ“
Arsenyj „cptkurtka023“
Denys „amster“
Aleksei „alex666“
eigandi rafíþróttaliðsins Monte, Dmytro Vovk

Eftir að listinn var gefinn út baðst rafíþróttaliðið Monte afsökunar en liðið taldi sig hafa fengið leyfi til þess að taka þátt á nokkrum mótum án þess að koma heim á milli.

Monte segist einnig hafa sýnt Úkraínu mikinn stuðning en liðið komst í undanúrslit á stórmóti þar sem leikmennirnir kölluðu „Glory to Ukraine“ eða sigur til Úkraínu fyrir framan milljónir manna.

Það er ekki komið í ljós hvaða afleiðingar þetta mun hafa á rafíþróttamenn í Úkraínu en margir óttast að erfiðara verði að fá tiltekin ferðaleyfi hér eftir.