Alain Prost (t.v.) með þáverandi ökumanni Prostliðsins, Frentzen. mbl.is
Prost hefur áhuga á stjórastarfi hjá Renault
Alain Prost, fyrrverandi heimsmeistari ökuþóra í formúlu-1, gefur til kynna, að hann hafi áhuga á að taka við liðsstjórastarfi hjá Renault. Alla vega vill hann ekki útiloka að hann ráði sig til liðsins í stað hins burtrekna Flavio Briatore.
Er Bob Bell var útnefndur til að stýra Renault til bráðabirgða í kjölfar brottreksturs Briatore linnti vangaveltum um að Prost myndi taka við starfinu.
Bell segir nú alls óvíst að hann verði í liðsstjórastarfinu lengur en til vertíðarloka. Fyrir bragðið hefur umræðan um Prost blossað upp að nýju.
„Þetta er flókið mál,“ segir Prost, sem er 54 ára og á sínum tíma fjórum sinnum meistari ökumanna, í samtali við belgíska dagblaðið l'Avenir. Sjálfur hefur hann ekki verið viðriðinn formúlu-1 frá því að lið í hans eigu fór á hausinn og hætti ári ð2001.
„Ég er ekki í atvinnuleit, en þetta er nokkuð sem gæti verið áhugavert. Það veltur allt á því hvað Renault vill,“ bætir Prost við.
Í samtalinu kemur hann inn á örlög Prostliðsins og segir: „Einhvern tíma mun ég skrifa bók sem lýsir því dæmi öllu. Það vita það mjög fáir hvað raunverulega gerðist. Og að biti í því púsli féll nýlega af stalli sínum,“ segir Prost.
Til baka