Renault keppir áfram í formúlu-1. reuters
Renault áfram í formúlu-1
Stjórn franska bílaframleiðandans Renault ákvað á fundi í París að tefla áfram liði sínu fram til keppni í formúlu-1. Verður því ekkert af því að fjórði bílsmiðurinn heltist úr lestinni á einu ári, til viðbótar við Honda, BMW og Toyota.
Renault hefur ákveðið að selja ótilgreindum fjárfesti meirihluta í liðinu en því verður samt áfram teflt fram í nafni franska bílafyrirtækisins. Herma fregnir, að Renault muni aðeins eiga 25% í liðinu, hafi ákveðið að selja 75% í því.
Að minnsta kosti fjórir aðilar hafa boðist til að kaupa sig inn í liðið en ekki verður skýrt frá því hver eða hverjir hafa orðið fyrir valinu fyrr en eftir helgi.
Kaupsýslumaður í Lúxemborg, Gerard Lopez, hefur staðfest að hann sé meðal þessara og hafi verið reiðubúinn að kaupa þrjá fjórðu í Renaultliðinu - og að því yrði samt sem áður teflt fram undir óbreyttum merkjum.
Þá hefur Bretinn David Richards sóst eftir að komast yfir liðið eða hluta þess. Hann hefur mikla reynslu af rekstri keppnisliða í ralli og formúlu-1.
Til baka