Alonso er bjartsýnn á komandi keppnistíð. reuters
Alonso sannfærður um ágæti Ferraribílsins
Fernando Alonso segist fullur tilhlökkunar og hafa trú á að 2010-bíll Ferrari, sem liðir nefnir F-10, verði samkeppnisfær. Bíllinn var sviptur hulum í höfuðstöðvum liðsins í Maranello á Ítalíu í dag.
Alonso gekk til liðs við Ferrari að loknu síðasta keppnistímabili og leysir Kimi Räikkönen af hólmi. Hann segist rólegur yfir komandi keppnistíð en þar er markmiðið að bæta hressilega um betur frá í fyrra er uppskeran var fremur slök, bæði hjá honum á Renault og fyrir Ferrari.
Alonso við Ferrarifákinn á frumsýningu Ferrari í dag. reuters
„Ég er mjög sáttur við framlag allrar tæknisveitarinnar hér. Þeir eru þeir bestu í heimi. Sú vinna sem mun eiga sér stað í febrúar ásamt tillögum okkar Felipe [Massa] varðandi bílinn veitir mér mikið sjálfstraust gagnvart fyrsta kappakstri,“ segir Alonso.
„Við erum með mannskap sem getur sett bílinn upp eins og best verður kosið á örskotsstundu. Tæknisveitin, gögnin úr prófunum í vindgöngum, fjöðrunin, vélvirkjarnir og vélin eykur traust manns. Svo getur allt eins farið að niðurstaðan úr reynsluakstri verði enn meira uppörvandi,“ bætir Alonso við.
Massa og Alonso í Ferrarigöllum ársins.
Og heimsmeistarinn fyrrverandi lagði áherslu á að samband þeirra liðsfélaganna, hans og Massa, væri mjög gott.
„Felipe og ég keppum báðir fyrir Ferrari. Það er mikilvægt að rauður bíll sigri. Við munum báðir leggja okkur alla fram um að bæta okkur, leggjum okkur báðir 100% fram. Ég hef alltaf átt öfluga ökumenn sem liðsfélaga og samskiptin við þá hafa aldrei verið erfiðleikum bundin. Samband mitt við þá alla er gott og það verður ekkert öðru vísi með Felipe.“
Alonso (t.h.) og Massa eru ekki beint árennilegir á skíðunum.
Til baka