De la Rosa og Kobayashi svipta Sauberbílinn hulunni. reuters
Sauber frumsýnir C29
Sauberliðið frumsýndi keppnisbíl sinn, C29, í Valenciabrautinni á Spáni í gær, sunnudag. Varð með því þriðja formúlu-1 liðið til að svipta nýjum bíl hulunni. Ugga aftur úr kæliturni véarhússins svipar til útfærslu McLaren.
C29-bíllinn verður knúinn Ferrarimótor og er sá fyrsti sem Sauber teflir fram eftir brottfall BMW úr formúlu-1 í lok nýliðins árs. Peter Sauber, sem seldi liðið á sínum tíma til BMW árið 2005, er nú við stjórnvölinn á ný, eftir að hafa keypt liðið til baka af þýska bílafyrirtækinu.
Peter Sauber með ökuþórunum Pedro de la Rosa (t.v.) og Kamui Kobayashi. reuters
Þótt Ferrarimótor verði í bílnum ætlar Sauber að halda BMW-tákninu í nafni liðsins, a.m.k. til að byrja með. Aðkoma þýska bílafyrirtækisins að liðinu er þó engin.
Ökumenn Sauber í ár verða Pedro de la Rosa og Kamui Kobayashi. Um tíma leit svo út að liðið gæti allt eins horfið af vettvangi formúlunnar þar sem BMW tilkynnti það ekki til þátttöku í ár í fyrrasumar. Brottför Toyota úr formúlunni varð liðinu til bjargar.
C29-bíll Sauber. reuters
Bíll Sauber verður ennfremur í sömu litum og bílar BMW undanfarin ár. Hvítu svæðin eru þó meira áberandi nú þar sem liðið er með færri styrktaraðila en áður.
De la Rosa er í fullu starfi sem keppnisþór á ný eftir sjö ára dvöl í herbúðum McLaren sem reynsluökumaður enska liðsins. Telur Sauber sig eiga eftir að njóta mjög þeirrar miklu reynslu sem hann öðlaðist þar, hjá einu af toppliðum formúlunnar.
Kobayashi og de la Rosa við C29-bílinn við frumsýningu hans í Valencia. reuters
Kobayashi þreytti frumraun sína í formúlu-1 í fyrra er hann keppti í tveimur síðustu mótum ársins fyrir Toyota. Frammistaða hans þá varð til að hann var ráðinn til Sauber.
De la Rosa og Kobayashi hefja í dag reynsluakstur Sauberbílsins í Ricardo Tormo brautinni í Valencia.
Til baka