Lokaæfingunni fyrir tímatökur rússneska kappakstursins í Sotsjí var hætt í miðjum klíðum eftir harða ákeyrslu nýliðans Carlos Sainz hjá Toro Rosso á öryggisvegg.
Æfingin var ekki nema rétt rúmlega hálfnuð þegar Sainz missti vald á bíl sínum á bremsusvæði fyrir þrettándu beygju með þeim afleiðingum að hann flaug út úr brautinni, skall á steinvegg og grófst svo inn í öryggisvegginn.
Þegar hann var borinn burt á börum og þeim lyft inn í sjúkrabíl lyfti Sainz hönd og gaf merki með því að vísa þumalfingri til lofts. Æfingin var stöðvuð þegar í stað en síðar aflýst með öllu.
Bestum tíma hafði Ncio Rosberg hjá Mercedes náð fyrir óhappið, 1:38,561 mínútum. Í öðru sæti var Valtteri Bottas hjá Williams (1:39,287) og þriðji Lewis Hamilton hjá Mercedes (1:39,363).
Í fjórða og sjötta sæti urðu Force India félagarnir Sergio Perez og Nico Hülkenberg. Milli þeirra varð Felipe Massa hjá Williams sem ók hraðast á seinni æfingunni í gær.
Jenson Button og Fernando Alonso hjá McLaren urðu í sjöunda og níunda sæti og á milli þeirra Pastor Maldonado á Lotus. Tíunda besta tímanum náði svo Felipe Nasr hjá Sauber, ók hringinn hraðast á 1:41,229 mín.
Kimi Räikkönen og Sebastian Vettel hjá Ferrari voru í 12. og 16. sæti á lista yfir hröðustu hringi æfingarinnar þegar henni var aflýst. Biðu þeir 15 mínútum lengri en aðrir að hefja akstur og höfðu því ekið nokkru minna en aðrir þegar hætt var.