Ekki var langt liðið á fyrri æfingu dagsins í Sepang í Malasíu er hún var stöðvuð vegna elds í bíl Kevins Magnussen hjá Renault. Stóðu logar upp úr bílnum í bílskúrareininni.

Magnussen var að koma inn að bílskúr Renault af úthring er bál blossaði upp í bílnum. Áttu vélvirkjar fullt í fangi með að ráða niðurlögum eldsins.

Gekk einnig mikið á er reynt var með miklum flýti að koma Magnussen upp úr bílnum.

Þótti allt benda til að eldsneyti hafi lekið út við vélarhússhlífina. Tilraunir til að fleyta bensíni burt urðu þess valdandi að eldur blossaði upp aftur og aftur. Þótti það skelfileg sjón og ógnvekjandi fyrir þá sem unnu við bílinn framan við bílskúrinn. Á endanum náðu þeir yfirhöndinni og þrátt fyrir allt sakaði engan við óhapp þetta.

Vegna atviksins varð 15 mínútna töf á að æfingin gæti hafist að nýju.