Staddur á lélegri bíómynd?

Besta knattspyrnufólk landsins var krýnt á samkomu í Háskólabíó í fyrrakvöld þar sem FH-ingurinn Atli Guðnason og Valsarinn Katrín Jónsson voru útnefnd knattspyrnumaður og -kona ársins og það verðskuldað að flestra mati. Ákveðið var í haust að breyta út af venjunni og í stað þess að halda veglegt lokahóf með pompi og prakt á Hótel Íslandi var boðað til samkomu á mánudagseftirmiðdegi í Háskólabíói.

Kannski má segja að lokahófið á Hótel Íslandi og sú umgjörð sem þar hefur verið um árabil hafi verið orðið barn síns tíma en sú umgjörð sem boðið var upp á samkomunni í Háskólabíó í fyrrakvöld var hreint út sagt ansi döpur og hálfgerð óvirðing við það knattspyrnufólk sem tók á móti viðurkenningum sínum.