Hollenska knattspyrnusambandið hefur samið við gamla refinn Ruud van Nistelrooy um að vera nýráðnum landsliðsþjálfara, Guus Hiddink, til halds og traust með liðið.
Van Nistelrooy verður því með í för þegar Holland kemur hingað til lands og mætir Íslandi á Laugardalsvelli í undankeppni EM þann 13. október.
Hinn 38 ára gamli fyrrum framherji Manchester United og Real Madrid skoraði 35 mörk í 70 landsleikjum á sínum tíma, en hann lék sinn fyrsta landsleik árið 1998 og þann síðasta fyrir þremur árum.
Hiddink er við stjórnvölinn hjá Hollendingum í annað sinn, en hann var einnig landsliðsþjálfari á árunum 1995-1998.