Norrköping og AIK mættust í toppslag 18. umferðar sænsku úrvalsdeildarinnar í dag. AIK var i sjöunda sæti deildarinnar með 30 stig fyrir leik liðanna á meðan Norrköping var með 35 stig í þriðja sæti.
AIK þurfti því nauðsynlega á sigri að halda til þess að missa ekki af lestinni í toppbaráttunni. Það varð raunin, en lokatölur í leiknum urðu 2:1 fyrir AIK.
Haukur Heiðar Hauksson lék allan tímann í hægri bakverðinum hjá AIK og Arnór Ingvi Traustason sömuleiðis á kantinum hjá Norrköping.
Norrköping hefði getað skotist á topp deildarinnar með sigri í dag, en liðið er í þriðja sæti deildarinnar með 35 stig, stigi á eftir Djurgarden sem er í efsta sæti. AIK kom sér af fullum krafti inn í toppbaráttuna, en með sigrinum í dag er liðið komið í fjórða sæti með 33 stig og er í seilingafjarlægð frá toppsæti deildarinnar.