Talið er líklegt að spænski knattspyrnustjórinn Pep Guardiola muni skrifa undir nýjan samning við þýska stórliðið Bayern München. Þar með bindi hann enda á vangaveltur þess efnis að hann sé á leið til Englands til að taka við stjórnartaumunum hjá Manchester City.
Samningur Spánverjans við Bayern rennur út eftir tímabilið, sem er hans þriðja í Þýskalandi. Hann hefur nú þegar unnið þýsku 1. deildina tvisvar og stefnir ótrauður á að vinna hana í þriðja skiptið.
Helsta ástæðan fyrir því að Guardiola vill framlengja samning sinn ku vera sú að hann og fjölskyldan kunna svo vel við sig í München. „Borgin er klikkuð. Ég elska það. Ég og fjölskyldan erum mjög ánægð hérna,“ sagði Guardiola á dögunum.
Aðspurður sagði hann það vera ástæðu til að hvetja sig til að dvelja lengur í Þýskalandi. „Það væri auðvitað stór ástæða. Við ræðum málin betur um miðjan desember og komumst að farsælli niðurstöðu fyrir mig og félagið,“ sagði Guardiola að lokum.