Tottenham Hotspur verður án fimm lykilleikmanna sinna þegar liðið mætir CSKA Moskvu í annarri umferð Meistaradeildar Evrópu annað kvöld.
Harry Kane, Eric Dier, Mousa Dembélé, Danny Rose og Moussa Sissoko fóru ekki með liðinu til Moskvu og verða fjarri góðu gamni í leiknum á morgun vegna meiðsla.
Tottenham Hotspur fór illa af stað í Meistaradeildinni, en liðið laut í lægra haldi fyrir Monaco með tveimur mörkum gegn einu á Wembley í fyrstu umferð riðlakeppninnar.
Það gengur hins vegar betur í ensku úrvalsdeildinni, en liðið er í öðru sæti deildarinnar með 14 stig eftir sex umferðir og er fjórum stigum á eftir Manchester City sem trónir á toppi deildarinnar.