Manuel Neuer, markvörður og fyrirliði Bayern München og þýska landsliðsins, er ósáttur með meðferðina sem Bastian Schweinsteiger hefur fengið hjá José Mourinho, knattspyrnustjóra Manchester United.
Schweinsteiger hefur verið úti í kuldanum hjá portúgalska stjóranum og hefur ekki einu sinni fengið að æfa með aðalliðinu. Eftir 4:0 tap á móti Chelsea segir Neuer að fyrrverandi samherji sinn eigi nú að fá tækifæri að spila með liðinu.
„Það er erfitt þegar þú færð ekki að vera með á æfingum og þarft að æfa einsamall. Ég vona innilega að Bastian komi inn í umræðuna. Við vitum öll að hann er einn besti miðjumaður í heimi og heima í liði Manchester United en ekki að æfa einn út af fyrir sig,“ sagði Neuer við fréttamenn í gær þegar hann var spurður út í stöðu Schweinsteiger hjá Manchester United, sem hann gekk til liðs við fyrir síðustu leiktíð.