Landsliðsmaðurinn Arnór Ingvi Traustason var hetja Rapid Vín þegar liðið vann 1:0 sigur á St. Pölten í austurrísku A-deildinni í knattspyrnu í dag.
Arnór Ingvi skoraði sigurmarkið á 79. mínútu en hann lék allan tímann og auk þess að skora nældi hann sér í gult spjald.
Lið hans lyfti sér þar með upp í 5. sæti deildarinnar með 24 stig úr 18 leikjum, en er talsvert á eftir fjórum efstu liðunum. Altach er með 36 stig, Sturm Graz 33, Salzburg 31 og Austria Vín 31 stig.