Barcelona er með 1:0-forystu eftir fyrri viðureign sína gegn Real Sociedad í átta liða úrslitum spænsku bikarkeppninnar í knattspyrnu.
Brasilíumaðurinn Neymar skoraði eina mark leiksins úr vítaspyrnu á 21. mínútu, en leikið var á heimavelli Sociedad. Barcelona er því með mikilvægt útivallarmark á bakinu fyrir síðari viðureignina í næstu viku.
Atlético Madrid er svo í góðum málum í viðureigninni við Eibar, en Atlético vann fyrri leikinn í kvöld 3:0. Antoine Griezmann, Ángel Correa og Kevin Gameiro skoruðu mörkin.