Van Gaal ræðir við Holland

Louis van Gaal, fyrrum knattspyrnustjóri Manchester United er í viðræðum við hollenska knattspyrnusambandið, sem vill fá hann til starfa innan sambandsins. Hann mun hins vegar ekki taka við af Danny Blind, sem var rekinn sem þjálfari karlalandsliðsins í síðustu viku. 

Van Gaal hefur ekki þjálfað síðan hann yfirgaf Manchester United, eftir að hafa stýrt þeim til sigurs í enska bikarnum í lok síðustu leiktíðar. Hollendingum hefur gengið mjög illa undanfarið, en þessi mikla knattspyrnuþjóð var ekki á meðal þátttakenda á EM í Frakklandi og nú er sæti á HM í Rússlandi í mikilli hættu. 

Holland er í 4. sæti A-riðils, þrem stigum á eftir Svíum sem er í 2. sæti og sex stigum á eftir Frökkum sem eru á toppnum. Holland er sem stendur á 32. sæti heimslistans, en þjóðin hefur aldrei verið eins neðarlega. 

Holland tapaði fyrir Búlgaríu í undankeppninni um síðustu helgi, 2:0 og fékk Blind reisupassann í kjölfarið. Van Gaal þjálfaði hollenska landsliðið frá 2012 til 2014 og náði hann m.a 3. sæti á HM í Brasilíu 2014. 

• Blogga um frétt