Það verður án efa tilfinningaþrungin stund þegar Francesco Totti, sem er í guðatölu í Róm, leikur sinn síðasta leik fyrir Roma þegar liðið mætir Genoa í lokaumferð ítölsku efstu deildarinnar í knattspyrnu karla síðdegis í dag.
Luciano Spalletti, þjálfari Roma, hefur staðfest að Totti muni vera í mikilvægu hlutverki í leiknum. Totti sem er orðinn 40 ára gamall hefur leikið 27 leiki á yfirstandandi leiktíð, en hann hefur hins vegar aðeins sex sinnum verið í byrjunarliði liðsins.
Totti hefur leikið 785 leiki fyrir Roma og skorað í þeim leikjum 307 mörk, en hann hefur allan sinn feril leikið fyrir Rómverja og spilað með liðinu í 25 leiktíðir. Talið er að Totti muni taka við stöðu yfirmanns knattspyrnumála hjá Roma í sumar.
Totti gaf út yfirlýsingu á fimmtudaginn síðastliðinn þar sem hann sagði að leikurinn gegn Genoa í dag yrði sá síðasti sem hann myndi spila í treyju Roma. Á mánudaginn myndi hann svo taka glaður á móti nýrri áskorun, en hann gaf ekkert út um hver nýja áskorunin yrði.
Roma er fyrir leikinn í öðru sæti deildarinnar með 84 stig og þarf á sigri að halda til þess að tryggja sér öruggt sæti í riðlakeppni Meistaradeildar Evrópu á næstu leiktíð.