Ítalski sóknarmaðurinn Mario Balotelli verður áfram í herbúðum Nice í Frakklandi á næstu leiktíð en hann framlengdi samning sinn við félagið í dag um eitt ár.
„Super Mario Balotelli verður áfram í Nice,“ segir á vef félagsins og forráðamenn þess augljóslega ánægðir með það en hann skoraði 17 mörk í 28 leikjum á síðustu leiktíð fyrir félagið er liðið lenti í 3. sæti og tryggði sér með því sæti í umspili um laust sæti í Meistaradeild Evrópu.
Sagt er að Balotelli hafi þurft að taka á sig launalækkanir til þess að dvelja áfram á frönsku rívíerunni og að hjartað hjá honum hafi ráðið fremur en buddan, en margir töldu eftir síðasta tímabil að kappinn myndi yfirgefa Nice. Svo fór þó ekki.