Arnór lagði upp mark í sigri

Arnór Smárason lagði upp fyrsta mark Hammarby sem vann öruggan 3:0-sigur á Örebro í sænsku úrvalsdeildinni í knattspyrnu í dag. Arnór lék allan leikinn og var fyrirliði Hammarby í leiknum.

Birkir Már Sævarsson var allan tímann í hægri bakvarðarstöðunni hjá Hammarby og Hjörtur Logi Valgarðsson lék allan leikinn fyrir Örebro. 

Hammarby er í níunda sæti deildarinnar með 28 stig og Örebro er í 11. sæti með 27 stig þegar 20 umferðir eru búnar. 

Kristinn Steindórsson spilaði allan leikinn og Kristinn Freyr Sigurðsson síðustu 35 mínúturnar í 3:1-tapi Sundsvall gegn Kalmar á heimavelli. Sundsvall er í 14. sæti af 16 liðum og í miklum fallslag. 

• Blogga um frétt