Ögmundur Kristinsson, markvörður Excelsior, er í liði vikunnar fyrir frammistöðu sína í leiknum gegn AZ Alkmaar í hollensku úrvalsdeildinni í knattspyrnu í gær.
Ögmundur stóð sig afar vel á milli stanganna þegar Excelsior vann góðan 2:0 útisigur og er hann í liði vikunnar hjá netmiðlinum Voetbal.
Þetta var fjórði leikur Ögmundar með Excelsior í deildinni en hann gekk í raðir félagsins frá sænska liðinu Hammarby í síðasta mánuði.
Ögmundur og félagar eru í 12. sæti af 18 liðum í deildinni með 7 stig eftir sex leiki.