Leikur Íslands einn sá stærsti í sögunni

Gernot Rohr, landsliðsþjálfari Nígeríu er afar spenntur fyrir leiknum gegn Íslandi á HM í Rússlandi í sumar. Þjóðirnar eru saman í D-riðli ásamt Argentínu og Króatíu. Rohr segir leikinn geta verið einn þann stærsta í sögu heimsmeistaramótsins í fótbolta. 

Hann talar einnig um íslensku stuðningsmennina og segir þá vera þá bestu í heimi ásamt því að hann hrósar íslenska liðinu. 

„Ísland veit hvernig á að spila fótbolta, en á sama tíma eru leikmenn sterkir og duglegir. Þetta verður mjög erfiður leikur og það verður fullt af stuðningsmönnum mættir og þeir íslensku eru þeir bestu í heimi," sagði Rohr í samtali við football365.fr. 

„Þetta er öðruvísi leikur en við höfum áður séð á HM og hann getur verið einn sá stærsti í sögu mótsins. Það er gaman að sjá hvað þjóðirnar í riðlinum þekkjast vel. Króatía og Ísland mætast oft og þetta er í fimmta skipti sem Nígería og Argentína mætast í lokakeppninni," bætti sá þýski við. 

• Blogga um frétt