Kínverska kvennalandsliðið í knattspyrnu, undir stjórn Sigurðar Ragnars Eyjólfssonar, vann stórsigur á Víetnam, 4:0, í fyrsta leik sínum á alþjóðlegu móti sem hófst í Foshan í suðausturhluta Kína í dag.
Jin Kun, Wang Shanshan, Wang Shuang og Song Duan skoruðu mörk kínverska liðsins sem gæti mætt því íslenska í Algarve-bikarnum í byrjun mars. Auk Sigurðar Ragnars, sem tók við liðinu skömmu fyrir jól, eru Halldór Björnsson og Dean Martin í þjálfarateymi liðsins.
Kólumbía og Taíland gerðu jafntefli, 1:1, í hinum leik dagsins á mótinu. Kína mætir Taílandi á sunnudaginn og Kólumbíu í lokaumferðinni á þriðjudaginn.
Kína er í 14. sæti á heimslista FIFA, Kólumbía í 22. sæti, Taíland í 29. sæti og Víetnam í 33. sæti þannig að mótið er nokkuð sterkt á heimsmælikvarða. Til samanburðar er íslenska landsliðið í 18. sæti heimslistans.
Hér fyrir neðan má sjá auglýsingu sem kínverska knattspyrnusambandið gerði fyrir mótið í Foshan:
NATIONAL TEAM | @CFA's poster for the International Tournament of Foshan. The competition starts on Friday. pic.twitter.com/0WkpGusZTa
— China Women's Team (@ChinaWFT) January 17, 2018