Þýski landsliðsmaðurinn Jerome Boateng leikmaður þýska meistaraliðsins Bayern München á það á hættu að missa af HM í Rússlandi í sumar.
Boateng varð fyrir meiðslum í læri í tapi Bayern München gegn Real Madrid þegar liðin áttust við í fyrri viðureign liðanna í undanúrslitum Meistaradeildarinnar í gærkvöld.
Ljóst er að Boateng spilar ekki meira með Bayern á leiktíðinni og framundan er kapphlaup við tímann hjá honum að ná sér góðum af meiðslunum í tæka tíð fyrir HM.
Boateng, sem er 29 ára gamall, á að baki 70 leiki með þýska landsliðinu og varð heimsmeistari með því í Brasilíu fyrir fjórum árum.