Tryggvi Hrafn Haraldsson skoraði í 3:1-sigri Halmstad gegn Värnamo í sænsku B-deildinni í knattspyrnu í dag.
Með sigrinum er Halmstad nú í fjórða sæti með 13 stig, fjórum stigum frá næsta liði. Höskuldur Gunnlaugsson var einnig í byrjunarliði Halmstad og var tekinn af velli á 62. mínútu. Tryggvi hefur ekki átt fast byrjunarliðssæti í liði Halmstad það sem af er tímabili en hann nýtti tækifærið vel í framlínunni í dag.
Sif Atladóttir og stöllur í Kristianstad unnu 2:0-sigur á Rosengård í sænsku úrvalsdeildinni en Glódís Perla Viggósdóttir var í hjarta varnarinnar hjá Rosengård.
Elísabet Gunnarsdóttir þjálfar Kristianstad og Björn Sigurbjörnsson er henni til aðstoðar en með sigrinum er liðið nú með níu stig í deildinni í þriðja sæti, einu stigi frá Rosengård sem var að tapa sínum fyrsta leik á tímabilinu.