Uli Hoeness, forseti knattspyrnu risans Bayern Munchen, hefur látið Mesut Özil heyra það eftir að sóknarmaðurinn lagði landsliðsskóna á hilluna í gær, aðeins 29 ára að aldri.
Özil, sem er ættaður frá Tyrklandi en fæddur í Þýskalandi, hætti m.a. með landsliðinu vegna kynþáttafordóma en hann var einnig harðlega gagnrýndur fyrir frammistöðu sína er Þjóðverjar féllu úr leik í riðlakeppni heimsmeistaramótsins í Rússlandi í sumar.
„Ég er feginn að þetta sé búið, hann hefur verið afleitur í mörg ár,“ sagði Hoeness sem er ekki þekktur fyrir að liggja á skoðunum sínum.
„Hann vann síðast einvígi á vellinum fyrir heimsmeistaramótið 2014 og núna felur hann sig og sínar ömurlegu frammistöður á bak við þessa ljósmynd,“ bætti hann við og vísaði þar til þess þegar Özil lét mynda sig með forseta Tyrklands skömmu fyrir heimsmeistaramótið.
Að lokum bætti hann við að Özil hafi alltaf verið gerður að skotmarki í leikjum Bayern Munchen og Arsenal en Özil hefur aðeins tvisvar verið í sigurliði gegn þýska stórveldinu í 17 leikjum.
„Alltaf þegar við mættum Arsenal þá spiluðum við í gegnum Özil vegna þess að við vissum að hann væri veikleikinn þeirra.“