Portúgalinn Cristiano Ronaldo fékk að líta sitt 11. rauða spjald á ferlinum þegar hann var rekinn út af í sínum fyrsta leik með Ítalíumeisturum Juventus í Meistaradeildinni í gærkvöld.
Ronaldo, sem var niðurbrotinn þegar hann gekk út af á Mestalla-leikvanginum í Valencia og brast í grát, var fjórum sinnum rekinn af velli þegar hann lék með Manchester United og í tvígang í leik gegn grönnunum í Manchester City.
Portúgalinn var sex sinnum sendur af velli þegar hann lék með Real Madrid og ellefta rauða spjaldið fékk hann svo að líta eftir 29. mínútna leik með Juventus í gær.
Ronaldo verður í banni þegar Juventus mætir Valencia á heimavelli í næstu umferð og mögulega verður hann úrskurðaður í tveggja leikja bann sem myndi þýða að hann missir af leik sinna manna gegn gömlu félögunum í Manchester United á Old Trafford.