Real hugnast ekki að færa leiki vestur um haf

Real Madrid hefur gert spænska knattspyrnusambandinu kunnugt að félagið sé alfarið á móti hugmyndum um að leikir í spænsku deildinni fari fram í Bandaríkjunum í markaðstilgangi. 

Forráðamenn Real sendu sambandinu bréf þar sem mótmælunum er komið á framfæri en til stóð að leikur Girona og Barcelona á þessu keppnistímabili yrði spilaður á Miami á Flórída. 

Bréfið hefur verið birt opinberlega og þar kemur meðal annars fram að Madrídingar telja að með þessu sé staða liðanna í deildinni ekki jöfn. Auk þess var bent á að sambandið hefði lítið samráð haft við félögin en slíkt hefur heyrst frá fleiri félögum. 

Viðbrögðin við hugmyndunum hafa verið misjöfn og æðsti maður knattspyrnumála í heiminum, Gianni Infantino, forseti FIFA, lýsti sig andsnúinn hugmyndunum. 

• Blogga um frétt