Töpuðu óvænt á heimavelli

Glódís Perla Viggósdóttir og samherjar í sænska liðinu Rosengård biðu óvænt lægri hlut á heimavelli gegn Slavia Prag frá Tékklandi, 2:3, í Malmö í kvöld en þar mættust liðin í fyrri leik sínum í sextán liða úrslitum Meistaradeildar Evrópu í knattspyrnu.

Þar með þarf Rosengård væntanlega að vinna tveggja marka sigur í seinni leiknum í Prag eftir tvær vikur.

Slavia Prag, með stóran hluta tékkneska landsliðsins sem gerði 1:1 jafntefli við Ísland á Laugardalsvellinum í september, komst þrisvar yfir í leiknum. Veronika Pincová skoraði á 14. mínútu en Lisa-Marie Utland jafnaði fyrir Rosengård átta mínútum síðar. Tereza Kozárová kom Slavia yfir á ný á 36. mínútu.

Hin þýska Anja Mittag jafnaði aftur fyrir Rosengård á 52. mínútu en fimm mínútum síðar skoraði Petra Divisová með langskoti og Slavia komið í 3:2. Þrátt fyrir þunga sókn náði sænska liðið ekki að jafna. Glódís, sem lék allan leikinn með Rosengård, lagði m.a. upp gott færi fyrir Mittag sem náði ekk iað skora.

• Blogga um frétt