Framherjinn Óttar Magnús Karlsson gæti orðið liðsfélagi Jóns Dags Þorsteinssonar hjá danska úrvalsdeildarfélaginu Vendsyssel.
Óttar, sem lék alla leiki U21-landsliðs Íslands í síðustu undankeppni EM, er til reynslu hjá Vendsyssel og lék með varaliði félagsins í 1:1-jafntefli við Midtjylland í gær. Óttar Magnús lék 77 mínútur í leiknum.
Þessi 21 árs knattspyrnumaður er með samning við Molde í Noregi sem gildir út næsta ár. Hann var á láni hjá Trelleborg í Svíþjóð í ár en lék aðeins fjóra leiki í byrjunarliði, og alls 14 deildarleiki. Hann verður ekki áfram hjá sænska liðinu, sem féll úr úrvalsdeild.