Samningur við Hannes framlengdur

Þýska knattspyrnufélagið Deisenhofen hefur framlengt samning sinn við þjálfarann Hannes Þ. Sigurðsson til loka keppnistímabilsins 2020.

Hannes tók við þjálfun liðsins síðasta sumar og hefur gengið vel í vetur. Félagið leikur í sjöttu efstu deild í Þýskalandi, í hinni svokölluðu Landesligu í Bæjaralandi, og er þar í baráttu um að fara upp um deild og upp í „Bayernliguna“ sem er efsta deild áhugamanna í suðurhluta Þýskalands. Þar fyrir ofan eru síðan atvinnudeildirnar fjórar.

Frétt af mbl.is

Hannes þjálfar í Þýskalandi

Deisenhofen er í þriðja sæti deildarinnar með 41 stig eftir 21 leik og á heimasíðu félagsins er sagt að Hannes sé afar metnaðarfullur og ákveðinn þjálfari en þetta er hans fyrsta lið á þjálfaraferlinum.

„Ég tel að það að við skulum strax framlengja samninginn við Hannes Sigurðsson sé gott merki fyrir allt félagið. Við viljum komast lengra og vera komnir í Bayernliguna árið 2020. Í Hannesi erum við tryggja okkur áfram fyrir næsta tímabil frábæran þjálfara og félaga, og það er tilhlökkunarefni þegar liðið fer aftur af stað eftir vetrarfríið," segir Alex Schleicher, framkvæmdastjóri liðsins, á heimasíðunni.

Lið Deisenhofen með Hannes fyrir miðju í annarri röð. Ljósmynd/Deisenhofen

Hann­es, sem er 35 ára gam­all og lék 13 lands­leiki fyr­ir Íslands hönd, er einn víðförlasti knatt­spyrnumaður Íslands. Hann lék frá 2000 til 2016 með FH, Vik­ing í Nor­egi, Stoke á Englandi, Brønd­by í Dan­mörku, Sundsvall í Svíþjóð, Spar­tak Nalchik í Rússlandi, Atyrau í Kasakst­an, Mjäll­by í Svíþjóð, Grödig í Aust­ur­ríki, Sand­nes í Nor­egi, Re­gens­burg í Þýskalandi og síðast var hann spilandi aðstoðarþjálf­ari hjá Eger­sund í norsku C-deild­inni.

• Blogga um frétt