Kristófer Ingi Kristinsson skaut Willem II í undanúrslit hollensku bikarkeppninnar í knattspyrnu í kvöld.
Willem II vann 3:2 útisigur á Twente í átta liða úrslitunum og skoraði Kristófer Ingi sigurmarkið með skallamarki á 86. mínútu, tólf mínútum eftir að hafa komið inn á sem varamaður.
Kristófer Ingi, sem er 19 ára gamall, hefur komið við sögu í níu leikjum Willem II í deildinni og hefur í þeim skorað eitt mark. Kristófer lék með Stjörnunni áður en hann fór til Hollands árið 2016. Hann hefur leikið með öllum yngri landsliðum Íslands, samtals 32 leiki og hefur í þeim skorað tvö mörk.