Sverrir Ingi Ingason og félagar hans í PAOK eru grískir meistarar í fótbolta. Liðið tryggði sér titilinn með 5:0-stórsigri á Levadiakos í næstsíðustu umferðinni í grísku A-deildinni í dag.
PAOK er með fimm stiga forskot á Olympiacos, þegar einni umferð er ólokið. Eins og áður í grísku deildarkeppninni var Sverrir allan tímann á varamannabekk PAOK.
Hann kom til PAOK í janúar frá Rostov og hefur ekki fengið að spreyta sig í grísku deildinni.
Sverrir Ingi hefur hins vegar spilað þrjá leiki í gríska bikarnum, þar sem PAOK er komið í undanúrslit.
Ögmundur Kristinsson stóð allan tímann á milli stanganna hjá Larissa sem vann 1:0-útisigur á AEK. Larissa er með 34 stig í níunda sæti.