Thomas Tuchel þjálfari franska meistaraliðsins Paris SG var ekki ánægður með háttarlag Brasilíumannsins Neymars.
Neymar hefur verið að jafna sig eftir meiðsli en það sem fór fyrir brjóstið á þjálfaranum var að Brasilíumaðurinn skellti sér til Madridar í vikunni til að fylgjast með Davis Cup í tennis.
„Ég er ekki pabbi hans og ég er ekki lögga,“ sagði Tuchel á fréttamannafundi í dag að aðdraganda leiks Paris og Lille í frönsku 1. deildinni sem fram fer annað kvöld.
Líklegt er að Neymar snúi aftur inn í lið Paris SG en hann hefur ekkert spilað með liðinu frá því í byrjun október.
„Ég er þjálfari hans og hann hefur æft vel. Líkaði mér að hann fór í flugi til Madridar? Nei alls ekki. En er þetta þess virði að ég verði brjálaður yfir þessu? Nei. Ef allt fer vel þá getur hann spilað á morgun. Hvort hann byrji inná eða komi inná sem varamaður kemur í ljós,“ sagði Tuchel.