Juventus er komið aftur í toppsæti ítölsku A-deildarinnar í fótbolta eftir öruggan 3:1-sigur á Udinese í dag. Cristiano Ronaldo átti stóran þátt í sigrinum og skoraði Portúgalinn tvö mörk.
Ronaldo kom Juventus á bragðið með marki strax á níundu mínútu og um hálftíma síðar bætti hann við öðru marki.
Leonardo Bonucci bætti við þriðja marki Juventus í lok fyrri hálfleiks og var staðan í leikhléi 3:0. Ignacio Pusetto skoraði sárabótamark fyrir Udinese í blálokin og þar við sat.
Juventus er með 39 stig eftir 16 leiki, en Inter á leik til góða og getur farið upp í toppsætið með sigri á Fiorentina í kvöld.