Óvíst um sæti í byrjunarliðinu þrátt fyrir þrennu

Þótt norska ungstirnið Erling Braut Haaland hafi skorað þrennu sem varamaður í fyrsta leik sínum með Dortmund í þýsku 1. deildinni í fótbolta um síðustu helgi er alls ekki víst að hann verði í byrjunarliðinu þegar Dortmund fær Köln í heimsókn á föstudagskvöldið.

Lucien Favre, knattspyrnustjóri Dortmund, sagði á fréttamannafundi í dag að Haaland hefði byrjað frábærlega. „Hann hefur góð áhrif í kringum sig, fer í allt af fullum krafti og vill alltaf vinna. Það er frábært að þjálfa leikmenn eins og hann. Hann  gerir alltaf svona þegar hann brennir af færi á æfingu,“ sagði Favre og greip um höfuðið.

„Það má vel vera að hann verði í byrjunarliðinu en það er alls ekki víst,“ sagði Favre og vildi ekkert gefa upp um áætlanir sínar fyrir föstudagskvöldið.

Haaland lék í 25 mínútur gegn Augsburg um síðustu helgi og skoraði þrjú mörk í leik þar sem Dortmund sneri blaðinu við eftir að hafa lent 3:1 undir og vann að lokum 5:3.

• Blogga um frétt